monumenta.ch > Ordericus Vitalis > Ordericus Vitalis, Historia ecclesiastica, p3, p4, VII. Mors Durandi Troarnensis abbatis. - Victor papa eligitur. - Urbanus papa.
Ordericus Vitalis, Historia ecclesiastica, LIBER OCTAVUS., , VI. Rogerus Cenomanensis comes cum Roberto duce pacem facit. - Nequitia Roberti comitis Belesmensis. - Normanniae magnates inter se belligerant. <<< >>> VIII. Varii in Apulia Normannia et Anglia eventus. - Quorumdam magnatum mors. - Restricta Guillelmi Rufi administratio.
VII. Mors Durandi Troarnensis abbatis. - Victor papa eligitur. - Urbanus papa.
1 Durandus siquidem, Troarnensis abbas grandaevus, ab infantia monachus, religione et sapientia praecipuus, ecclesiastici cantus et divini dogmatis doctor peritissimus, sibi durus carnifex, aliisque mitis opifex, post multos in Dei cultu labores, in lectum decubuit, et bene, ut prudens et fidelis servus, ire ad curiam domini sui paratus, III Idus Februarii [1088], de saeculo migravit. 2 In eius transitu res non silenda contigit. 3 In corpore praefati Patris, dum obiret, bipartitus color visus est. 4 Nam in sinistra parte vultus eius, et totius corporis, usque ad pedes, niveus candor apparuit, totamque dexteram partem plumbeus livor obtexit, et omnino dexteram medietatem, ut albedo sinistram, a vertice capitis usque ad pedes obtinuit. 5 Insolitum itaque discrimen conspecti coloris terrorem intuentibus incussit, et inusitatae rei causam studiosis inquisitoribus ad exprimendam subtilitatem perspicacitatis suae ingessit. 6 Inde diversi diversa dixere. 7 Sed non est nostrum huic breviloquio singula inserere, quae multipliciter eloquentes ex abundantia sensus sui protulere. 8 Quidam quidem laevam et dexteram ad actualem et contemplativam, vel praesentem et futuram vitam interpretati sunt. 9 Alii vero prodigium hoc praesagium fore futurorum opinati sunt. 10 Venerabiles discipuli glebam religiosi doctoris in capitulo suo reverenter sepelierunt, et in candido lapide, qui subpositus est, epitaphium hoc addiderunt. 11 Hac tegitur tumba bonus et venerabilis abba.
12 Durandus, nostri norma monasterii.
13 Ad Domini laudem, praesentem condidit aedem,
Qua sibi propitium credimus esse Deum.
14 Luce sub undena februi, resolutus habena
Carnis, ad angelicam dirigitur patriam.
15 Sepulto pastore, Troarnensis grex Arnulfum, Sagiensis monasterii priorem, eligit, ac ut sibi praeponeretur, a rectoribus ecclesiasticis ac principibus suis expetiit. 16 Illis autem congratulantibus, et libenter quod postulabant annuentibus, Arnulfus Troarnensium regimen suscepit, quod fere XXII annis solerter tenuit, et tam verbis quam scriptis et salutaribus exemplis subiectos erudiit. 17 Praefata nimirum duo monasteria, sicut ab uno principe primordium fundationis ceperunt, sic ex uno fonte usus divinae servitutis et monastici ordinis institutionem sumpserunt. 18 Rogerius enim de Monte Gomerici utrumque coenobium monachis dicavit, et Fiscannensis norma utrumque monachico ritui applicavit. 19 Unus amor hos pariter coenobitas connexuit, signipotensque Martinus, Turonensis archipraesul, suo mancipatu commissos custodit. 20 Sagienses a Troarnensibus primum sibi abbatem sumpserunt, et nunc, eodem adhuc patre vivente, amicabilem sibi vicissitudinem de discipulis eius repetierunt. 21 Quo adepto, Deo gratias egerunt, bonique pastoris solertia bene profecerunt. 22 Tunc Rodbertus, Normanniae dux, optimatum suorum supplicationibus acquiescens, Henricum fratrem suum concessit, et a vinculis, in quibus cum Rodberto Belesmensi constrictus fuerat, absolvit. 23 Circa haec tempora [1085] Gregorius papa in urbe Beneventana defunctus est, et Desiderius, Cassinensis abbas, in Victorem, Romanum papam, electus et inthronizatus est. 24 Defuncti vero papae corpus in confessione Sancti Bartholomaei apostoli tumulatum est, ubi meritis eius fidei petentium miraculorum copia divinitus ostensa est. 25 Nam leprosi de aqua, unde corpus eius ablutum fuerat, petierunt; qua consecuta, fideliter loti sunt, et opitulante Deo, protinus mundati sunt. 26 Victor papa, postquam apicem pontificatus ascendit, primam missam in die sancto Pentecostae solemniter cantare coepit. 27 Sed, occulto Dei nutu, gravem morbum subito incurrit. 28 Nam, diarria cogente, ter ad latrinam de missa ductus est, et sic in papatu vix una tantum missa perfunctus. 29 Hic magnae nobilitatis et sapientiae fuit ac religionis, coenobiumque Sancti Patris Benedicti, quod in Monte Cassino constructum est, longo tempore rexit. 30 Inde ad praesulatum assumptus, repente, ut diximus, infirmatus est. 31 In aegritudine tamen a Pentecoste usque ad Augustum languens, defunctus est. 32 Quo defuncto, Romanus clerus convenit, et Odonem, ex monacho praesulem Ostiensem, in Urbanum, Romanum papam, elegit. 33 Hunc Deus Israel maximum principem contra Allophilos constituit, turremque David cum propugnaculis contra faciem Damasci commisit. 34 Hic erat natione Gallus, nobilitate et mansuetudine clarus, civis Remensis, monachus Cluniacensis, aetate mediocris, corpore magnus, modestia discretus, religione maximus, sapientia et eloquentia praecipuus. 35 Adhuc Guitbertus, invasor apostolicae sedis, Ecclesiam Dei conturbabat, ac adulando vel persequendo cunctos quos poterat, ab unitate pacis ad suum schisma pertrahebat. 36 Odo nimirum, comes Sutriae, nepos eius erat, et ecclesiasticae pacis fautores pluribus pressuris coercebat. 37 Urbanus papa, confisus in Domino coelorum, qui non relinquit virgam peccatorum super sortem iustorum, misit legatos et epistolas Romanae auctoritatis Francis et Graecis, aliisque gentibus per orbem constitutis, ut in fide catholica irrefragabiliter persisterent, et omnem scissuram a lege Dei et corpore Christi, quod est Ecclesia, callide praecaverent. 38 Solus Henricus, Teutonum princeps, et pedissequi eiusdem Guidberto cohaerebant. 39 Galli vero et Angli, aliaeque gentes pene omnes per orbem Urbano pie obsecundabant.
Ordericus Vitalis, Historia ecclesiastica, LIBER OCTAVUS., , VI. Rogerus Cenomanensis comes cum Roberto duce pacem facit. - Nequitia Roberti comitis Belesmensis. - Normanniae magnates inter se belligerant. <<< >>> VIII. Varii in Apulia Normannia et Anglia eventus. - Quorumdam magnatum mors. - Restricta Guillelmi Rufi administratio.
monumenta.ch > Ordericus Vitalis > Ordericus Vitalis, Historia ecclesiastica, p3, p4, VII. Mors Durandi Troarnensis abbatis. - Victor papa eligitur. - Urbanus papa.